Voici le Manifeste Libertaire Comtois (Manefêsto Yibretâre Comtou), rédigé par des camarades anarcho-communistes de Besançon, et qui proclame les principales aspirations du mouvement fédéraliste libertaire comtois.
FCL n’étant pas un mouvement politique, nous ne nous exprimons pas sur les revendications qui sont portées dans le Manifeste, mais il est clair que nous soutenons son contenu général et la volonté d’émancipation affichée.
Le texte original en comtois (jurassien):
MANEFÊSTO YIBRETÂRE COMTOU
Dâdon lâs primies temps gangalous di l’indéviduélismo, é l’hàdjö di ceti que nôs aippelans lai Renaitçhaince, et que, pö trétus lâs gestes çhaîriés di l’âmonsse, bêdeutait l’aivéniaince di yun aîdge novèl detchus çolu di lai tyranaince, yunne quêçhtion enpôjonne lai geste dâs hannes et dâs fènnes que ant, é yun âmonsse o yun âtre, sondgiés di yunne soûtçhetât moiyouje. Ceti quêçhtion est: c’ment mantegni lai convétiaince entre lâs envietâtes vétiâs di l’indévidué et lâs enfâtes necesséras d’ouêdre di yunne soûtçhetât sivilisée? En chaî, c’ment piaidgie lai yibretât et lou réchpét di lai vétiaince diens yun udjô ouêdrenné? Ceti quêçhtion e faicenié lâs peupyes et lâs nâtçhions c’ment éye e faicenié l’Hiçhtouére. Aivaint qu’éye ne tcheurzisse, l’éponçie et lai motrayaince di yunne élita indjeûtriâ detchus lai soûtçhetât sannaient naiturâles et n’ant été que fin dyére rebotées en fât. Mains l’ensannaijiôn di l’indéviduélismo e redju necesséra l’indgéne di novèles mezautés di magniaie lâs udjôs yumïns.
Ce feût de cheûte lou yibrélismo bordgeais, inçhpiré en pâtçhie dâs Ençhaîriés et que s’est fôrfeûré djainque-é-ci, que feût aiprecié c’ment lou môtre di soûtçhetât perféte; pués, ce feût lou soûtçhalismo, et en pairtitiulé sai variainte autorétâre. Ceti dous môtres di gonverniaince ant fât prùve di loure incapacétât é piaidgie lai yibretât et lâs yôts vétiâs di l’indévidué, c’ment és ant moénés, et conténuent di moénaie lâs soûtçhetâts é loure ruène.
Âjedeu encoé, lâs crimes di capétalö et di sai variainte éstâtisée, rebaptaiyée « soûtçhalismo » pai lâs intyûtes et lâs bordgeais, se fôrfeûrent et câsent âs peupyes, âs nâtçhions et â mondö dâs domaidges caravalétiâs.
Lou soûtçhalismo yibretâre, que répicade lou prïnçipe autorétâre di yunne soûtçhetât herrartçhesée et fondyée detchus lai diviaince di clâsses, e ballevoie été desegnée c’ment yunne utôpia, yunne sondgeniaince d’erregnés raitâlistes, vêr yunne dondjurouje raitaince viée é l’enéantijion dâs nâtçhions. Ôro, l’hiçhtouére et l’éspèriaince nôs ant môtrés et conventçhus que, âye, lou soûtçhalismo, aîje aippeûlé « anartçhésmo » ou « comunismo », aivait trové l’épiet di mantegni l’âpyon entre l’indévidué et l’udjô. Lou soûtçhalismo prâdge lai yibretât,lai pairiaince politicâ, répraindgâ et soûtçhâ, l’auto-ouêdrajion et l’entr’édaince; é répicade l’éponçie, l’ herrartçhie, l’échpoûtajion et trétôte fôrma di povoi.
Ê vétçhére, â coûe di l’Ûropa, et ceti dâdon pus di yun milyénâre, yunne nâtçhion aippeûlée Frantçhe-Comtât, et que âjedeu est aipreciée c’ment fâjant pâtçhie di l’Estät Frantçhais. Ceti nâtçhion, c’ment trétôtes lâs nâtçhions detchus ceti piainne, est éponçiée, étofée, échpoûtée, taint que nâtçhion et que peupye.
Êponçiée, pö yun Etsät indjeûtriâ, teniu pai yun povoi étraindgie â peupye comtou, s’aidjuge l’autorétât et lou yôt di lougaie et d’aippyitçhaie dâs lougés sains lai pairticipâjion et sains l’aiccoé dâs comtous; di yeûsaie et d’échpoûtaie noûtro virevière et nôs dyenries pö lou compte di companies bordgeaises sains noûtro consentremeint; d’otiupaie nôs véllas et nôs rûes d’aîvo dâs rottes di politious, di tchnoyes et di kaiseurlés que mantegnent l’estät d’éponçie que pâje detchus nôs.
Étofée, pö sai laindye, sai tyûlture, sïn hiçhtouère, sai capacetât indgéniâ et d’inètçhâtive sant forfyaimeint aitieuvéyées di lai chûrpaince et di mondö peubyitçhes; rembrûerées et desegnées d’aîvo mépré c’ment « yunne tyûlture fâssouje », « yun fölklouré di pâyisous » o encoé « yun pâtoué, yun frantçhais défôrmé ». Trétot-ci est encoé yunne fi l’ôvra di l’Estät capétaliste, autorétâre et çantrayé teniu pai lou povoi frantçhais.
Êchpoutée, pö c’est paitchot lou reingne di lai lougé capétaliste, detchus nôs faîtçhis, nôs sements, nôs tchaintyéts, nôs burôs, nôs hôspitas. L’ôvrou bésaigne tçheche djô sains dyainie lou gaidge di sïn dieu airâdge, lou pâyisou optene é poéne di quê subsichtaie, aidonc qu’é neûrri lai soûtçhetât entôte, lai serïndiouje o l’ïnchtrûriouje se voût sains rête fochée di tieusaie lâs indévidués d’aîvo dâs moiyeins toûedjö pus çhailes. Et taindis que yunne flôpe di pus en pus sôleinte se preusse âs juntés di secoué peupyâre et dreume detchus lou trottelou, lâs bainchiers, lâs pâtronous, lâs politicious et les capétanos d’indeûçhtrie, entoélés di loures tiuries et di loures soûdaits, chmierent d’aîvo di breût reûbé âs ôvrous. Pö dieç hannes, yun lône maindgou et nûef maindgés: vêto l’ouêdre soûtçhâ que loure Estät peûrit et sorduré nôs engâje!
Nâni! Ceti situaichion ne pôt dïnlé durie.
Lai Frantche-Comtât est éponçiée, et nôs devans brétçhie lou jhög que lai corbaie. Pöquê?
Pairquê c’est noûtre nâtçhion, noûtre virevière soûtçhâ et yumïn. Se nôs vôlans yibraie l’indévidué et aibôli sïn éçhquiavaidge di clâsse, nôs devans pairiemeint yibraie lai soûtçhetât diens laique é y’évit, et invâchemeint.
Nôs n’aiprecians pès lai nâtçhion c’ment yunne entitye tchupériâre é l’indévidué, c’ment yun coûe oûrganicâ, c’ment yunne câse que nôs dépèsse et eçhdyidge que nôs lu saiccrifians nôs indéviduélitâts. Lai nâtçhion est yune volentât tieumûne di dechtin, yun loiyïn que reloiye lâs êtres. Et c’est pö que ceti loiyïn se mantegne et se renfoéche que nôs devans fâre nétçhie yunne cogniaince nâtçhionâ et di clâsse. L’Estät éponçe lai yibretât, lou capétalö éponçe lai pairiaince, l’ouêdre modâ éponçe lai cogniaince, lou portchét éponçe lai djeûcheté, lai yunifôrmajiôn cantrayiste éponçe lai nâtçhion. Nôs mâtrayans pö aibaittre ceti dyivèrne de l’éponçie, qui câse lai ruène dâs peupyes et lâs dive.
Nôs ne demaindans ran é nôs anêmis, pès pus que nôs éçhpérans loure toleûraince. Nôs n’en aivans pès é loure édyaid. Ceti que nôs vôlans, nôs le pârerans, et se lai clâsse diridgainte mairçhe contye nôs, tçheche râds qu’éye fâra lai raippretchera di sai pôpre detrûjiôn.
Nôs aiffiermans d’pairiemeint noûtre seûlidyaritât d’aîvo trétus lâs peupyes di mondö, détçhidés que nôs sannes é mâtrayaie d’aîvo eûs contye lou capétalismö et l’autorétât crimenâs.
Nôs éçhdyidgainces ne sant ne négeûciabyes, ni remânviabyes.
Nôs serans yibres et d’pairie, o nôs ne serans ran.
Nôs volans:
*Que l’Estät frantçhais renonce é sïn autoétât detchus lou céne et lâs setadious comtous.
*Que lâs foéches et aidminichtrâjions di l’Estät frantçhais râtent loures aidgivitâts detchus lou céne comtou et lou tçhittent sains repét.
*Que lâs lougés, décrâtous et ouêdrennainces pômuldyiées pai l’Estät frantçhais detchus lou céne comtou suént décyarés nas et piepe’aivenius.
*Lai dileûtajiôn boussiétâ di Consely rédgionâ, dâs Conselys dgeûrnâs, caintonâs et tieûmunâs, dïnle que lâs commandainces.
*Que lâs comtous suént mâtres di loures lougés: nôs volans lai fôrmajiôn dâs Conselys peupyâres diens tçheche entitye dgéogrâfique. Ceti Conselys sarant repreusentéss pai yunne Aissembiée conçhtituainte que aira pö mission di redidgie lai futùre conçhtitujiôn.
*Lai tiêumunisâjiôn totâ dâs tieres, dâs faîtçhis, des emtrêprijes, dâs vaitcheries et co-ôvrayéves paiyisâs, dâs hôpitâs, dâs juntés di sèrvtçhes peubyices, dâs maigaisïns et juntés di dichtribûjiôn, en fïn di trétôte pôprietât di prôdujiôn, di magniaince et di dichtribûjiôn.
*L’aiboléchaidge di lai pôprietât privée-é ne pès mâçhaie d’aîvo lai pôprietât indéviduâ-detchus trétôt lou céne comtou.
*Lai teniaince di yun referundum peupyâre detchus l’aiveni di la Frantche-Comtât â sôin di lai Frantche. Nôs djeûtans que lai Comtât ne sârait d’moraie â sôin di lai Frantche que si ceti driere devïnt yunne répeubyique yibretâre, déb’nâtée di l’Estät.
En fïn, nôs volans lai Répeubyique dâs Conselys di Frantche-Comtât, répeubyique yibretâre et soûtçhâliste, sains clâsses et sains autorétât.
More é lai yunifôrmajiôn prêtçhie pai lâs çantrayistes et lâs diridgaints bordgeais, et more é raîcismo et é nâtçhionâlismo grietes et çhtériles di l’échtrême-yéte, nôs proésans l’altiernatève yibretâre et mârtierrâre, que mannera lâs peupyes detchus lai vie di lai yibretât, di lai pairiaince, di l’entr’édaince et di lai djeûcheté pö trétus et trétôtes.
Lai câse que nôs défandans est djeûte, et nôs lai férans trionfaie.
Frantche-Comtât abada! Vétia lai révirâtion soûtçhâ et yibretâre!
Dâs comtous et comtoujes yibres.